Vawlei Tuanbia ah Kum Nobik Nobel Peace Prize Hmutu Sister Malala Yousafzai

"Vainaam nakin cafung pakhat hmual a ngei deuh," ati tu Malala Yousafzai cu July 12, 1997 ah Pakistan ram Swat Valley ah a chuak. Amin hi Pashtun caṭial thiam hnu zulin sakmi asi i Malala Yousafzai sullam cu ‘grief stricken’ ti asi (ngaihchiatnak a tuarmi kan ti hnga maw). Swat Valley hi Pakistan ram chungah minthang mi hmun pakhat asi. Aruang cu khualtlawngmi hna (tourists) pawl nih an kal duhnak hmun asi. Asinain, Taliban uknak tangah a um caah fimcawnnak lei ah siseh, minung covo kong kau ah siseh itlukruannak a um lo. 

Malala Yousafzai nih a hngakchiat tein aa tinhbikmi cu ram daihnak le fimcawnnak kongkau ah luat-zalongnak a um khawhnak dingah asi.

Malala hi apa ZiauddinYousafzai nih a dirhmi sianginn ah sianginn a kai. Taliban nih nu pawl fimcawnnak (education) phih ding in lungtlinnak an ngeihmi duhlonak September 2008 ah “Zeitindah Taliban nih ka minung covo asimi fimcawnnak hrawh le lak an ngamh?” (How dare the Taliban take away my basic right to education?) timi tlangtaar in Peshawar ah bia chimnak a ngei. Malala cu minung covo le nu fimcawnnak khamtu Taliban pawl dohdaltu asi ruangah October 9, 2012 nii sianginn le an inn karlak ah Taliban nih akehlei cal ah an kah. Meithal kuan nih a hngawng tiang a phanh. Cu lioah a hawi le pahnih zong an hliam ve hna. 

Rianrang in Peshawar, military sii-zungpi ah an thlawp. An thlawp khawhnak dingah a luruh tlawmpal tiangin an laak (an khuai chap). Peshawar Military Hospital ah damh khawh ding asi lo caah, England ram, Birmingham ah aa thlawp ṭhan i dam. 

Kum 2011 ah International Children’s peace prize a hmuh. Cu kum ṭhiamṭhiam ah Pakistan ram National Youth Peace Prize a hmuh ṭhan. Kum 2013, October 10, ah European Parliament nih Sakharov Prize for Freedom of Thought timi an pek lawng si loin International Nobel Peace Prize hmutu zongah aa tel ve. Vawlei tuanbia ah Nobel Peace Prize a hmumi vialte lakah a kum no bik zong asi.

Malala chimmi, “Meithal kuan nih a daihter rua lai tiah, Taliban pawl nih an ka ruah. Asinain, an sung. Kan auchuah tu a thang chinchin. Ralhrang (terrorists) le Taliban nih kan i tinhmi vialte hrawh dih le thlen dih an duh nain zeite taktak hmanh an thlenmi a um lo. An thlenmi tu cu, derthawmnak, ralchiatnak le ruahchannak ngeiloin umnak vialte an tlau, thazaang thar, ṭhawnnak le ralṭhatnak tu an hung chuak (Weakness, fear and hopelessness died. Strength, power and courage was born). Cucu an thlenmi asi. A hlan i Malala kha ka si ko. Kaa tinhmi aa khat. Ka ruahchannak zong aa khat. Hmailei caah ka ruahmi zong aa khat dih,” ati.

Malala nih, “Nobel Peace Prize ka hmuh ahcun ka caah caan ṭha

asi, ka hmuh lo zongah kaa tinhmi cu Nobel Peace Prize hmuh kha asi hlei lo. Ka tinhmi cu mi vialte nih daihnak kan hmuh khawhnak ding le abikin ngakchia vialte nih lut-zalong tein fim an cawn khawhnak ding kha asi deuh,” ati. “A ngaingai ti ahcun Vainaam nakin cafung pakhat hmual a ngei deuh. Cucaah fimcawnnak hi pakhatnak asi. Fimcawnnak nih vawlei a thlen khawh, ” tiah a chim chap.

Malala nih a chimmi bawmhnak ah UN Secretary-General Ban Ki-moon zong nih, “Malaa Yousafzai hi vawlei dihlak fimcawnnak caah kan izohchunh ding (symbol) asi. Vawlei cung ah 61 million hngakchia nih fimnak an cawn kho lo. Cu vialte caah hruaitu dihlak le pumpak cio nih rian nganpi kan ngei,” tiah a chim.