2014, Kum Thar Donnak Rev. Fr. Thawng Ṭha Thang Bia Tawi Chimmi

Tlangtaar: Cahmai Thar (New Page)

Phi 3: 13, “Ka nu le ka nau hna, cu thil cu ka phan cang tiah ka ruat hrimhrim lo; sihmanhsehlaw thil pakhat ka tuahmi cu, hnulei thil kha philh i hmailei thil banh i zuam kha asi.”

Rev. Fr. Thawng Tha Thang (General Secretary of Believers Chruch, 

Myanmar)

Vawlei minthang pakhat nih, “Nihin bantuk ah kumthar kan phan khawhmi hi lunglomh awk thlak thluachauh asi,” tiah a chim. 

Nihin ah vawlei pi chim loin kan pawngkam ah a ummi mino tampi nih kum 2014 a phaan kho lo. Cu vialte lakah kum 2013 in 2014 kan phanh khawh caah lunglomh lo awk a ṭha hrimhrim lo. Minung sinak in ruah ahcun ka ṭih tukah ka hmul hmanh an i ling dih. Zeicaah tiah minung kan tuah khawhmi asi lo. Asinain, tuzaan ah Rev. Fr. Daniel hruainak in Salm 23 hna kan von rel khawh, kum 2013 in 2014 kan phanh khawhmi hi caan ṭha lawng hmanh siloin Pathian thluachuah taktak asi ko. 

Minung hi kan pum aa dang bantukin kan ruahnak zong aa dang cio. Unau pathum kan si i kan ruahnak le kan duhmi zong aa dang dih. Nain minung nih kan duhmi a lawhnak tampi lakah aa tel ve mi pakhat cu ‘athar/thil thar’ hi asi. Hngakchiat lio ko ah kan zual. Cu bantukin, caa kan ṭial zongah cahmai thar ṭial lai kan i ngeih tuk. Cahmai thar kan kau fatinte kan kuat ṭial a ṭhat ding kan izuam. Ruahnak thar kan chuah. Cu ve bantukin, kum hlun in kum thar kan lut cang tikah hin kan ruahnak, kan thazaang le kan itinhmi tiangin i thar chuah kan herh ve. 

Mithiang Paul cu a luanciami thli ah khan sal ah a cang lo. A ngaingai ahcun chuahnak um lo deng tiangin Paul nih a sining aa hmuh caan tampi a um lai. Pathian hmanh nih a ka ngeihthiam ko hnga maw? ti tiangin a luancia a thil a tuahmi kong a ruah caan tampi a um lai. Sihmanhsehlaw, cu vialte cu ka philh dih. Ka luat, a ti. 

Cu bantukin kan nih zong kan si ve awk asi. A luanciami thil kan philh lai, ti cu asilo nain a ṭhalomi thil kan tuahmi vialte kha hlawt khawh kan izuam a herh. Kum 2013, cahmai hlun ah zeibantuk cahaang sen dah na rak t'ial? Nungak le tlangval kongkau ah siseh, tangka kongkau ah siseh, kum 2013 ah kan rak tuahmi thil ṭhalo vialte tuah ṭhan ding kha itimh ding asi lo. A ngaingai ahcun Jesuh nih Vangcung khua le Hell kong hi tlawmte lawng a kan cawnpiak nain tangka kong cu tampi a chim. Cu nih cun tangka hi a biapi tuk ti a fianter. Khrihfabu tangka kong ah siseh, inn chungkhar tangka kongah siseh, kum 2014 ahcun kan ṭhancho ding asi. Kum 2013 ah ngaihthiam kan hal lomi kan hawi nu/pa an um sual asi zongah ngeihthiam kan hal hna awk asi timi ruahnak kan ngei lo ahcun Paul nih a kan cawnpiakmi ‘Cahmai thar’ asi mi kum 2014 nih sullam a ngei lai lo. 

Vawlei minthang Tata company siseh, Iphone company siseh, Software company zong siseh, motto special an ngei cio. An itinhning le motto ningin an i zuam. Cu bantukin, cahmai thar asi mi kum 2014 ahcun khuaruahhar thil a chuah khawhnak hnga, itinhmi hmaan kan ngeih a herh fawn. 

Kum 2014 January kan phan cang. Siahngakchia nu pawl umnak hi a cunglei ah kan ṭhial cang lai. Cu vialte asi khawhnak dingah one million leng a herh. Kan campus tii le mei ṭha tein kan hmuh khawhnak dingah two-three million man transformer cawk a herh. Cu vialte zong cu tangka kan ngeih ruangah kan tuah khawhmi asi lo. Tangka kan ngeih hlan hrimhrim in cu vialte thil asi khawhnak dingah Pathian sinah thlacamnak kan ngeih chung cang. Cucaah cun, Paul nih ‘reaching forward..’ a timi cu asi cu. Kan phanh rih lomi thil, ka phan hrimhrim lai, asi kho hrimhrim lai timi ruahnak le timh tuahnak hna hi kan ṭial lai dingmi ‘Ca Hmaithar’ kum 2014 ah hin kan hrin a herh ve. 

Mit a ngeimi nih hmu hna sehlaw, Hna a ngeimi nih thei hna sehlaw. Amen. 

_______________________________

Nawlnak: Cauk le cafung kaa keng lo. Ka ngeihnak in kaa chingchiah khawh zat, ka von tial phawt. Biatlang le biafang a hmanning tiangin a tlamtling lonak tampi a um. A ruahzia nan thiam lai, ka zumh.