Laiza Summit: Hriamtlai Phu Chungthil Zohfiannak

By Salai Van Lian Thang

Laiza Summit:

Sat, November 2, 2013----- Vawlei hruaitu bikbik tonnak G-20 summit bang ramtang hriamtlai phu ''Laiza Summit'' cu Tlangcung miphun caah a biapi ko. Nithum ah lim an timh nain an lim kho deuh lo; nikhat an sauh. Bia an i renghning a sa pah. Ruahcia te cu a si ko. Asinain, mual an pho hraw lo; lungsau tein khat le khat an duhnak an i kawl, donghnak ah lungtling tein bia an funti khawh. Tuanbia dawh, an tial, tiah ka ruah.

Tutan tonpumh an hrihnak chan cu: Acozah nih ''Nationwide Ceasefire Accord (NCA)'' minthut sawmnak bia hi  Tlangmi nih zeitin kan leh lai, zeitindah hmailei chonhbiaknak kan kalpi lai, zeidah kan tlaihtung le biatung an si hna lai, timi ceihkhan ah a si bik.

Ramtang hriamtlai phu 17 le  hruaitu 100 leng an kai. United Nationalities Federal Council (UNFC) chungtel phu 11 lengah UNFC a lut lomi RCSS/SSA, DKBA, KPC, DPA le ANC zong an kai. CNF in Pu Zing Cung, Dr. Lian Sakhong, Pu Thla Hei le Col. Than Htun zong an kai.

Pinlung khua hmete nih Kawlram tuanbia rolung a phun bang thinphan thlalaunak in bawmkhu le mitthli nih a rak khuhmi Laiza khua fate nih Tlangmi dohthlennak tuanbia roling a hun tial ve tak ko cang.

Tamadah a um thiam lo:

Tamadah Thein Sein zong a um thiam ve rua lo. Laiza ah ''lunglomhnak le thapeknak ca'' a kuat hna. Culong ai lungsi ruam lo. Ram pumpi theihin Radio in ''ai lomhning le ai ruahchanning'' a nolh than. Tutan Laiza biakhiah hi zeitlukdah ram muisam le tuanbia remhnak caah a biapit te lai, timi i fian dawh ngai a si.

Rampi huap kahdaihnak minthut an tinhnak a ruang cu: ''1nk. Tlangmi duhnak le halmi tlamtlinhpi khawhnak caah. 2nk. Kahdaih minthut ciami vialte fehter thannak caah. 3nk.  Political dialouge chunglei taktak luh khawhnak caah, kan tinh'' tiah Tamadah nih a chim,

Remdaihnak innpi chung luh khawhnak dingah ''political dialouge'' kutka in luh a hau i, cu kutka onnak tawhfung cu ''NCA minthut'' hmasa hi a si, lamdang a um lo, tiah an ruah.

Biahar Pahnih:

Tutan Laiza Conference chungah Tlangmi hruaitu hna kar biafun an i harh deuhmi bia pahnih a um.

Pakhatnak: ''Political dialogue tuah hmasa hnuah NCA minthut siseh'' a timi UNFC phu an um. ''NCA minthut hnuah Political dialogue ceihpeh a tha ko'' a timi Working Group for Ethnic Coordination (WGEC) phu, an um. Hi zawnah an i sukkalh pah.

Pahnihnak: Tutan Conference ah Tlangmi aiawhin ''Cozah chonhbiatu phu dirh seh, cu phu nih Tlangmi aiawh in biachim rel seh'' a timi WGEC phu an um. ''Cozah chonhbiatu phuthar dirh a herh ti lo, UNFC sercia Negotiation Team hi irinh seh, an mah nih va chon hna seh'' a timi UNFC phu an um. Hi zawn zong an har pah.

Tutan hnatlakmi cu Myitkyina ah an kalpi lai i, Cozah Chief Negotiator Aung Min hruaimi phu he an vai ceih than lai. Bia an i hmuh phum ahcun ''NCA minthut ni'' an khiah colh lai. Dr.Thant Myint-U nih ''Myitkyina ichonhnak hi tuanbia ah a biapi tukmi a si te lai'' a ti. Asinain, Myitkyina-talk a dih hnuah khan khat hnu khan khat in cho kainak lamcaan saupi nih a kan hngah ko. UNFC le WGEC hi kutsih in cho chuaklak an kaiti kho ngai te hnga maw; zei an va lawh te lai, timi ruahawk a hung um.

UNFC le WGEC phu:

Thein Sein nih ‟Peace Talk” sawmnak ca a thlah tikah Tlangmi Khawmpi cu Feb 2012 ah an rak kawh i an ni ceih. Hriamtlai phu 17 an rak kai. UNFC phu 11 zong an kai. Cu Khawmpi nih Cozah chonhnak tuaktantu “WGEC” timi hi a rak dirh. UNFC, ENC lengah mino nubu zong an telh dih hna. Chinmi in Dr. Sui Khar le Dr. Lian Sakhong an itel. Thlakhat voikhat meeting an thu. EBO nih phaisa in a dirkamh. WGEC nih “Framework for Political dialogue” cu an tial dih. Asinain, Cozah sinah hodah a va tlakpi lai, timi an iceih tikah bia an i hmu kho ti lo. UNFC nih ''keimah long ka kal lai'' a ti. WGEC nih ''zapi huapin  kan kal lai'' an ti. June 13 ah “WGEC in ka chuak” tiah UNCF nih a chuah taak. Cu hnuin phudang veve in Cozah an va chonh cio. Nain, sau an kal kho tuk lo. Tutan Laiza ah i ton hrim i; ''zeitin kan kalti khawh lai” timi ceihkhan lo khawh lo, dirhmun an hung lut than. 

UNFC chung Zohnak: 

UNFC hi KIO le NMSP nih pawlasi an khuhchilh (policy influence) deuhin a lang tawn. KIO in Lt. Gen N'Ban La cu UNFC Chairman a si i, NMSP in Nan Han Thar cu UNFC GS a si. Zohnak dangin cuanh ahcun: UNFC cu  Kachin le Mon nih an hruai deuh, kan ti khawh. Cozah nih faktuk a hlencia Khin Ngunt chan kahdaihnak tuahphu nih an hruai. Ramchung um Tlangmi Party phu 9 komhnak United Nationalities Alliances (UNA) he an khuaruahnak a luangti kho deuh lengmang dingin an lang. 2010 election luh an doh. 2008 Phunghram cu hnompung ah hlonh i, a thar tial siseh, an ti. Politik ceih hmasa locun NCA minthut an duh lo. Cozah chonh tikah an tlaihtung le dirhmun a hak pah ngai lengmang te lai. Phundang cun ''conservative'' khuaruahning nih a khuh deuh tawn hna, kan ti lai. Politik thiamfimnak nakin hriam thazaang tthawn an caah a biapi deuh. Ramkhel lampi (political struggle) nakin hriamnam (arm struggle) lampi in kan kawltung hi kan khel khawh deuh hrim lai, ti a zummi phu, kan ticun a palh tuk lai lo dah.

WGEC chung Zohnak:

WGEC pawlaci hi EBO director Harn Yawnghwe le BCES director Dr. Lian Sakhong hna nih an nenh deuhin a lang ve lengmang. Khuaruah har awk cu: RCSS le KNU nih hnulei in fek tein an dirkamh peng. Phun dangcun: Shan le Karen nih an hruai deuh, kan ti ve hna lai.Taktak ahcun: hi WGEC phu cu hlanlio Tlangmi funtubik ENC pawlasi kha a chungin a hun i hrolh than, kan ti khawh. ENC kha Karen le Chin nih an rak hruai deuh; Shan hruaitu Harn Yawnghwe nih a rak dirkamh hna. Hi hna hi WGEC muisam in an hun lang than. Zeimaw ahcun hriamtlai phu luchinh i khuh in meeting hna an hun kai. Hi hna phu hi ramchung Tlangmi party phu 15 komhnak Nationalities Brotherhood Federation (NBF) he an khuaruahning a kalti deuh lengmang kho te men lai. 2010 thimnak luh a hau, an ti. Palimen chungin kan kawltung khel ve hrim a hau, an ti. 2008 Phunghram cu hrawh nakin remh hi a lam a si deuh, an ti. NCA minthut hnuah politik biaruah a tha ko, an ti. Cozah chonhnak ah lenglei cun an tlaihtung le dirhmun a nem deuh tawn koin a lang tawn. Asinain, an chung leiah rak hak ve ziar hna seh law theih lo a si ve thiam ko. Hi phu a mawngtu hna hi politik thiamfimnak a ngeimi an tam. Hriam thazaang nakin politik thazaang an uar deuh. Phun dangcun: kan ral he cabuai cungah bia le cafung in ral ituk taktak an thi a um deuh; kan ral kha politik khelnak lamin kawltung leiah tlikpi a timmi phu, kan ti khawh ve hna lai.

RCSS le KNU Zohnak:

RCSS/SSA hi hmasa tein UNFC ah an lut bal lo. Lt. Gen Yawdserk nih a hruai hna. Ralkap 7,000 hrong an ngei; an ngan pah ve ko. Cozah thar rikawt ah kahdaih minthu hmasacem an si. Khuaruah har awk cu: RCSS aiawhin Laiza tonnak ah Harn Yawnghwe tutan an thlah hi a si. Hi pa hi hriamtlai phu le Cozah chonh khawhnak hnga hmawngthiamtu le mei kautu a rak si. Huham a ngei i, thil a ti kho, zultu tampi a ngei. Tulio hi KNU le RCSS kar pehtlaihnak hri fek tein khittu le tawh hrenhtu a siin a lang. Tlangmi politik khupthal zeimazat leh a timh. Tuning cun RCSS pawlasi hiKhun Htun Oo hruaimi SNLD nakin 2010 thimnak a cuhmi SNDP party he an luangti deuh lengmang te kho men. Asinain, politik ah zungzal ral le zungzal hoikom ti a um lo. Politician tha nih ral an ngei peng kho thai bal lo.

KNU hi UNFC dirhtu a hrampi an si nain UNFC hruainak an zul tuk lo. KNU chungah Bochohci Tamalabaw fanu KNU Vice-Chair Naw Zipporah Sein le David Tharkabaw phu nih UNFC pawlasi an tanh. KNU Chairman Buchohci Mutu, GS Kwe Htoo Win, Mahn Nyein Maung le Col. Htoo Htoo Lay phu nih WGEC pawlasi an dirpi. Mithi David Taw zong ai tel. Hi hna hi ENC a keng ruangruh an rak si. Ngaite ti ahcun: hlanchan piin KNU chungah a nemphu le a hakphu a rak um cang. Nikum KNU Congress ah Karen mipi nih kut an thlir tikah a nemphu leiin an thlir; a hakphu an tla. Tulio hi a nemphu nih KNU pawlasi an uk; a hak phu an cawl kho tuk lo. Tutan Laiza ah a nemphu an va kal. RCSS he an tangti. Laiza meting cu zeimazat a chak an merh taktak ko. UNFC nih faktuk in a al hnacun an mah tein kalzong a pawi lo, an ti te men lai. KNU chung kehkuainak nih Tlangmi hriamtlaiphu chungkhar a tlawm le a tam a hninh pengte dinghi cu a pawi deuh tawn.

CNF le Hmailei:

Laiza Conference long ahhin biahar a um lai lo. Dot tampi ah a um te lai. Nation-wide Ceasefire dot a ra lai, Framework for political dialogue nih a dot lai, Panglong Union Conference nih a peh lai, Union Accord minthut nih a zulh lai. Kum 2015 pin tiang a rau kho. Biahar tampi funherh le biahnok tampi phoih ding a um.

Tutan tonpumh ah thil a tlungmi hi lenglei ahcun ‟kawltung an ni khat nain a kalnak lam an i dan deuh phun” khin a hun lang. Asinain, a chunglei ah hram a thlakmi thil a thuk ko, tiah ka ruah. Politik ruahnak ''ideology'' in siseh, ramkhel biafang cun ‘left-wing le right-wing’ khuaruahning; bia dangcun ''conservative le liberal'' ruahning phun long an lakah a um lo; phu khat le khat izuamnak lengah geo-politik le ethnic politik hna nih an kar lakah bia a chim, tiah ka hmuh.

Hmailei khan tampi an kai i, cho a san deuh tikah CNF a dirhmun hi ruahawk a um ve len te kho. Tutan Laiza Conference ahcun a dirnak neh fiangset in ai thei kho deuhlo in a lang deuh. Hringtu KIO mithmai tih-ah UNFC leiin kut a thlirchel; WGEC pawlasi duhah culei kamin a zuan chel, tiin a lenglei cun a hun lang. Fek tein dirnak hram le itlaihnak tung fek an sercolh locun a karah bu a hninkho rungrul a luh len khawh caah ralrincia cu a hau deuh ve te hnga.

Laiza Biachahnak:

Tutan Laiza tonnak ah ''rampumpi huap kahdaih minthut tik dirpiding biatung 11'' an fehter. Pikpak in Cozah chonh ti lo ding le bukomh longin chonh cang ding, ai tel. Hi lengah ''NCA minthut ahcun zapi inthut, thutlo le zapi in thutlo siseh. Politik biaruahnak a um hrim lai, tiin Cozah biatiam fek a um hnuah NCA minthut siseh. 2015 hlanah biakchonhnak hi lim izuam siseh, NCA minthut ni 60 chungah political framework fehter dih siseh. Cu fehter hnu ni 60 ah political dialouge limdih siseh. Federal Tatmadaw cu Tlangmi huapin ser siseh law, ralkap cu  ''civillian control'' tangah kun cangseh. NCA minthut puaiah Tamadah, Hluttaw Speaker, ralbawizik, Sihnichoh, biaceih bawizik lengah Pi Suu Kyi le theihpitu ah UNO bawipa hna hna sawm siseh'' tiah an chah.

Hi biakhiahnak a kalpitu le Cozah he a ceihkhangtu phu ''Nation Wide Cease-Fire Coordination Team (NCCT)'' cu hruaitu 13 in an dirh. NCA min an thut dihcun an rian a dih lai. NMSP in Nan Han Thar, KNU in Kwe Htoo Win le KIO Buchoh Gunmaw nih an hruai lai. Asinain, RCSS nih ''tutan bia hi kan pom dih ko nain buchung policy ruangah minsen cu kan thu lai lo'' tiah min an thu lo. NCCT zongah min an pe lo. Laiza tonpumh ah mileng in a kai vemi   Buhmuchoh Kyaw Zaw fapa ralkap kong ekspat Aung Kyaw Zaw nih ''Cozah sin biatung an dirhmi pawl a nem deuh, hinak a hak deuhawk a si ko, cun an ilungrual deuh cu a hau te lai'' tiah tonnak a dihin a hmuhning a chim.

Tlangkawmnak:

Tutan Laiza chungthil kan zoh tikah KNU-RCSS phu le KIO-NMSP phu kar izuamnak (power struggle) a um deuhin a hun lang. UNO ah USA-UK biatung poah Rusia-Tuluk nih veto in kham dih, an duh bantuk kha a hun lo. KNU le KIO hi hlanchan NDF bukomh an umti lio tein an rak i su pah cang. Kheldang incun: Karen-Shan phu hruainak le Kachin-Mon phu hruainak karah thil a har deuhmi bantukin ruah khawh a si ve men hnga. Shan cu hlan chanin Tlangcung miphun a kan hruai tawntu an si. Karen cu dohthlennak ah a upabik an si. Hi phu nih Kachin-Mon sermi UNFC rawl einak cabuai ah an eika a thaw lem lai lo. Rawl an ihromti caan a tam lai; nain an duktla lomi tampi a um lai; zeimawcu rawlrialnak seh nih a rial khawh lo hrimmi a um len te lai. Tutan Shan nih minsen a thut duh lo phah hi thukpi in sullam a ngei.

Khel dang deuhin kan leh than ahcun: meithaltlai bakbak long (arm struggle) phu nih hruai duhnak le meithal a tlailo nain dohthlennak (political struggle) kum saupi a tuah vemi hruaitu hna kar izuamnak zong a hun i cawhchih in a lang. Bia dangcun: thluak thiamfimnak cafung phu le thazaang tthawnnak kuanfang phu tiin. Hihi lenglei ah zeitin muisam a langh ti ahcun: Cozah sinah a nemphu (solft-liner) le a hakphu (hard-liner) tiin, an hun lang. Chelcan cun ''Conservative'' le ''Liberal'' asiloah ''leftist or rightist'' politik khuaruahning nih ri a sermi phun deuh zongin an lang. Khan sangpi le khan niamte ruahsurtuk lioah nithawng an i chinhti ahcun hodah a cin deuh lai, timi long khi a va si ko hnga.

Kam khat ahcun: Cozah sin kahdaihnak min a thu bal lomi phu le a thu bal cangmi kar thilcang bantuk zongin a lang fawn. KIO-NMSP cu Cozah he remdaihnak min an rak thut bal. Nain, BGF pawlicy in hrawh an timh hna tikah an mitthut hri a cat i, ral an tho than. Hlennak fak an tuar. Cozah a zumh an zumh kho ti lo. KNU-RCSS phu hi kahdaihnak min an thu bal lo. Cozah he izumhnak ser an ifawih deuh kan ti lai. Hi phuhnih kar isehnak nih ramchung um ramkhelbu tiang hma a va putter te khawh hi cu ruah cu a rem deuh tawn lo.

Independence hrong Tlangmi hruaitu SCOUHP chanah Shan deuhnih mawtaw an kan mawngh. 1960s hrong ''Federal Movement'' chanah Shan thiam nih an kan hruai. Tutan Laiza tonnak bang Tawngyi Conference an rak kawh ve i, Tlangmi hruaitu 200 leng an rak kai. ''Shan proposal'' tiah Shan cathluanpi cu Tlangmi nih an rak hnatlakpi hna. U Nu Cozah heh an rak norti. Asinain, culio Chin Vuanci Za Hre Lian cu Shan nih a kan hruai kha a chungin a rak ei kho tuk lo; hnatlakpi duhloin Tawngkyi in a kir. Asinain, Capt Mang Tung Nung tu-nih cun a rak hnatlakpi hna i fek tein a rak dirpi hna. Chinmi aw pahnih in a rak i tthen. Hi chan longah a si lo. Chan hmasa Kawlram zeitin kan dirh hnga timi FAEC phu nih ruahnak an rak kan hal lioah Chinmi hi ''a dilna a satna'' in kan rak um.

Chin tuanbia ah a biapi ve dingmi tutan Hakha Conference ah ramkhelbu CPP le ZCD tel an i tim lo, tiah theih a si. Tulio remdaih chonhbiaknak hi ''2nk Panglong Conference'' dottiang a kai i; ''Union Accord'' minthut tikah tuning cun Chinmi aw hi aa tthente sual ko lai, timi phan a hung um. Hilioah kam khat leiah tulio Tlangmi hriamtlaiphu chungkhar ah a luangmi tiva hi ruahnak lengin a hraat ngaingai. Myitkyina le Tawngkyi bawlung puaiah Hakha nih a tanhzia le a telzia kan thiam hi a biapit ngaite lai lengah ti hraatnak ah ralring tein a liohzia le a tanzia zong kan thiam a biapi tuk te lai.