'Burma' Ti Hi 'Brahma' In A Rami A Si: Shan Scholar

Shan scholar le researcher Sai San Aik nih 'Burma' timi min hi Hindi (Vai) holh biafang 'Brahma' in ai semmi a si; kum 1988 in Kawl ralkap cozah nih 'Myanmar' tiah hruhru hranghrang in an hun thlen tiah a ti.

Brahmis Map

Brahma timi biafang sullam cu, zeizong sertu tinak a si tiah Hindi holh nih a fianhning a si.

Dr.  Than Tun (Shwebo) nih tuandeuh lio i a rak chimning he ai bebawm. "Hindu temple ah ka kal i, Brahmins a thiammi minung tampi he kan i tong. Cu hna pawl nih biafek an chimmi cu, Irrawaddy vasum nelrawn ah khua a rak sami Indian pawl kha Brahmins holh hmangmi an si i, (Kawlram hi) Brahmadesh tiah min an rak sak. A hnu ah a biafang ai rawk, ai rawk i, Bamar tiah ai chuah; a hnu ah ai thleng rih i, Burma tiah ai chuah an ka ti" tiah a chim.

Sai San Aik @ Sai Hsang Ai hi Burma ah a ummi miphun kong a hlat i, cauk ah a tialtu a si; Burman, Shan, Mon, Karen, Chin le Kachin kong a tial hna.

Pal-Sanskrit holh in a rami Bagan/ Pagan biafang khi Pyu holh Purugama in a rami a si i, Pyu khua tinak a si tibantuk in Sai San Aik nih a hmuhchuah. "580 BC ah Pyu (Purus) cu ral an sung i, Burma nichuahlei ah an i tthial i, Vishnu (Beithano) le Sriksetra siangpahrang pennak an dirh hna" tiah a chimfianh.

Irrawaddy timi hoi hi India ram, Punjab state i Ravi timi tivapi min a si tiah a ti. Burma ram ah "Buddhist biaknak a luh hlan in, Hindu chawlet pawl le Brahmins le siangpahrang fapale nih Southeast Asia ah an ra i, siangpahrang pennak tamnawn an rak dirh hna" tiah SHAN sinah a chim.

"Abhiraja nih Tagaung siangpahrang pennak a dirh ah khan, Buddhist biaknak a luh hlan kum 300 ringlo ah a rak si, kha siangpahrang kha Sakyan mi a si tiah zumh a si. Kha lio ah khan, Buddha pathian hrin a rak si rih lo" tiah a ti.

Source:http://globalchinnews.org/articles/theihtlei/burma-brahma.html