Let My People Think

By Henry Nawl Thang Bik

___________________________________________________

Let My People Think timi Radio Broadcasting Program ka ngai tawn. Main speaker hi vawlei minthang Ravi Zachariah asi. Ka ngaih fatin, kaa lunghmuih kho peng. Khrihfa zumhnak defend a tuahning ruah tikah khuaruahhar in a thiam. 

Tutan ah Let My People Think timi tlangtaar in cathluan von i thawnh ka duhmi cu phungdang tein asi lai. Cun, abikin kan cathluan hi Lairam context deuh in tialmi asi lai. 

Prophet Hosea nih Pathian bia a rak chim/au pi lengmang mi cu "Ka mi hna nih fimnak an bau caah an rawk," tihi. Nihin Laimi--upa, hngakchia sem tiang in kan ceih khawhmi hi Baibal kong asi. Lunglomh awk ngai asi. Mah balte thlarau kong le theology kong kan ceihnak ah vawlei kan nganh deng. A nganh cangmi hmanh tampi kan um, ti ning law ka palh thlu men lai lo dah? 

Kan Theology

Kan theology thlen kan herh. Minung a laicerbik timi theology nih kan lungput a rawh (extremely anthropo-centric) asi caah. Kan lungfim, thil kaa chingchiah kaa in a tu tiang camping le crusade kai a um peng. Ka chuah hlan zongah a um cang, tiah an chim ka theih. Kan chim kel, kan ngaih kel peng. A tha ko. Kan chim awk asi. Cucu, Jesuh nih misual a kan dawt caah Pathian sinnak kaltak in vawlei ah misual khamh awk ah a raa. A kan tlenh, ti hi. Nain, Kawlram khrihfa sinak kum 200 hmanh asi cangmi nih cu rumro cu maw kan ceih rih ko lai? Kan thang pah ve lai lo maw? A ngaingai lo ah, kan theology hi kan minung sining he aa tlak ti lomi tampi an um. Khah phundang in ruat hlah u, ka von tial ko lai. Kan Siangbawi te nih an rak kan chimhmi hla, Khrihfa hla bu i "Count Your Blessing Name Them One by One," timi hla i a caang thumnak zawn,

"When you look at others with their lands and gold,
Think that Christ has promised you His wealth untold;
Count your many blessings—*money cannot buy [*wealth can never buy]
Your reward in heaven, nor your home on high."

Hi hla ka sak fatin ka ruat tawn. Ahodah ramdang sui le ngun duh ruangah tuk le thah a hmangmi? Mi zeidah kan ram sui le ngun, diamond le lungvar vialte a lak dihtu? Hi hla a kan chimtu lila an si lo maw? Kan ram sui le ngun, diamond le lungvar vialte lakdih hnu, a hawng lawng an nganh tak hnu ah cun maw, mi ram sui le ngun, rumnak vialte zoh hlah u, nan ngeihmi te ah khan i lawm ko u, zeicatiah tangka nih a caw khawh lomi Vancung khua nan laksawng tu khi zoh an ti ngam? Rumnak hi thlarau caah asilo. Taksa rumnak zong Pathian nih a kan timhtuah piakmi asi ve ko. Abramham zong kha vawlei thluachuah pek dingin Pathian nih a kamhmi asi. 

Zeiruangah dah, a tlangpi in, Pathian riantuanmi kan sifah khun? Ziah sifah rumro kan i bochan? Pathian nih sifah dingin a kan timhmi kan si tung lo? Thlarua lawngte kan ruahnak ah vawlei kan nganh cang. Haleiluijah, Amen ti zong hi a sualnak a um lo. Pathian thangthatnak asi ko. Nain, chantiluan dawi thiam zong a herh ve. A tulio, Rangoon chene ah angki puahpi le bawngbi par-aan pi hna in heh tiah motor cungah Haleiluijah tiah  au usihlaw, mi nih 'mihrut pa' a ra hih, ti hmanh an kan ti phah lai. Ruah ngaingai kan herh. Pathian rian kan tuanrup zongin thlarau tlau kan tlai kho fawn lo. Kan theology mind-set pei a dik lo cu. Thlarua tlau kan timi hna hi Vancung ah a um mi an si lo. Vawlei ah a um an si ve ti zong hi theih a hau. 

Kan peh than te lai.