Dec 25, 2013 Christmas zing Bishop Dr. C.K. No Chhum thawngtha a tawinak in lakmi

Speaker: Bishop Dr. C.K. No Chhum   

Text: John 3: 16, "Cu ticun, Pathian nih vawlei hi a dawttuk hringhran caah a fapa ngeihchunte kha a pek. Cucaah, a mah a zum mipoah cu an thi ti lai lo, zungzal nunnak an ngei lai."

Bishop Dr. C.K. and Rev. Fr. Daniel (translator)

Chankhat hnu chankhat, Pathian nih a thimmi minung an um zungzal. An mah le caan cio ah mi ropui an si dih. 

1. Biakam hlun chungah 
(a) Adam (b) Noah (c) Abraham (d) Isaac (e) Jacob (f) Joseph (g) Moses (h) Joshua

(i) Biacheihtu  (Samson, Deborah,....tbt). (j) Saul (k) David

(l) Solomon le a dangdang, an mah le chan le caan cio ah Pathian nih aa thimmi minung an si.

Cu bantuk thiamthiam in

2. Biakam thar chung zongah

(a) Jesus (b) Peter (c) Paul (d) Church father pawl (Polycarp te hna...).  (e) Constantinople  

(f) Martin Luther (g) William Bush (h) Billy Graham le D.L. Moody te hna, an mah chan le caan cio ah Pathian mithim le mihman mi an si.

Cun, khatlei kam ah ramrian caah thimmi hruaitu tampi an um rih fawn. Cucaah, a fiangmi cu ram caah siseh, mibu nganpi le hmete caah siseh, Khuapi le khuate caah siseh, inchungkhar le unau rual cah tiang hmanh khin Pathian nih thimmi a ngei zungzal. Cu thimmi a ngeihnak hnawh chan cu an nunphung, an caholh, an ciruang, an zatlang nun, an identity vialte kilhkamhtu a duh caah asi, kan ti khawh.

Cu bantukin thimmi kan si khawhnak ding ahcun, "Timhtuahnak" nganpi ngeih kan herh. Fimthiamnaklei in siseh, vawlei lei in siseh minung lei in izuamnak tampi ngeih kan herh ve. Cu lakah a herhbikmi cu Pathian mit hmuh ah miding si le mitling si hi an si. Minung mit hmuh ah mitlinglo le santlailo si ko zongah Pathian hmaiah mitling, saan a tlaimi kan si khawh thiamthiam. A herhbikmi cu Pathian mithmuh ah mitling si hi asi.

19th Century Billy Graham an timi pa, Henry Morsesau hi Pathian nih khuaruahhar in a hmangmi pa asi. A kum cu 27 te lawng asi rih. Voikhat cu D.L. Moody, biakinn ah zaan sarih (7) chung thawngtha a chim. A pianthar cangmi, member hmanh tampi a ngei cangmi D.L. Moody nunnak tiang, Henry Morsesau thawngtha nih a thar tein a thleh-bauh dih than. Nun thlennak a thar tein a pek, kan ti lai cuh. 

Zaan sarih chung, Henry Morsesau nih a chimmi cu John 3: 16 chung hin asi. A chimmi cu, "John 3: 16 nakin a tha deuhmi Bible caang a um hnga maw, tiah Bible dihlak ka rel, ka zoh ko nain ka hmu bak lo. Cucaah, John 3: 16 chung hin ka chim than ko lai," a ti i, zaan sarih chung a pehnak asi, an ti. 

Henry Morsesau nih a chim thanmi cu, "Jacob hleihlak kha von i hlangin, Vancung khua khin hei kai kho ning law, Gabriel sinah Pathian dawtnak kong hung ka chim, tiah ka hal hnga. Gabriel zong nih .chim ding zeidang a ngei ve hlei lai lo, 'Pathian nih vawlei hi a dawttuk caah a Fapa ngeihchunte kha a pek," ti dah lo cun.

Bishop C.K. nih Baibal nih "Vawlei" a timi hi direct in minung cu a chim lo nain minung a sawhnak asi ko. Zeicaah tiah, English holh ah "worldly man" le "spiritual man" ti a um caah hi ka zawn ah Baibal nih 'vawlei' a timi hi "worldly man" kha a sawh duhmi asi. Minung cu a sualmi lawngte kan si caah worldly man ka si, ati.

Asinain, minung cu saram dang bantukin Pathian nih a ser lo. A sermi thil vialte cung nawlngeihnak sangbik a pek (Gen 1: 27ff). Saram dang cu special plan le ambition an ngei lo. Khuk i bil in, Pathian a thangthatmi zong an um bal lo. Sihmanhsehlaw, minung cu special plan kan ngei. Cu vialte lakah a sangbikmi cu Pathian kawl duhnak thinlung kan ngeihmi hih. Mizei bantuk hmanh nih Pathian/pathian an kawl dih. Animism hmanh nih an zawtfah caan ah lungpi maw, thingpi maw an va biak i raithawinak an tuah tawn. A sullam cu super natural power a ngeimi, phundang in kan chim ahcun minung thazaang nakin a thawng deuhmi pakhat a um, ti khi an ruahnak asi. Cubantukin, Greek khuapi, Athens khua zongah an raithawinak vialte a kalnak kha "To Unknown god," tiah min an bunh. 

Cu bantuk thiamthiam in, vawlei biaknak phun tampi nih Pathian/pathian an kawl. Pathian taktak hmuh duh ah an taksa le an thinlung duhnak vialte an hlawt. An pum an hrem. An kawlmi Pathian/pathian caah nunnak pek an ui lo. Asinain, cu vialte an tuahmi cu St. Paul cawnpiaknak he cun aa ralkah hoi. Mithiang Paul nih cun ".............biaknak caah nunnak kha meikhangh tiang zongin i pe hmanh law, dawtnak na ngeih lo ahcun....." ati. Aphi a chuakmi cu, minung nih Pathian a kawl chung poah cu 'biaknak' (religion) in a dong zungzal. 

vawlei biaknak dang nih cun Pathian an kawl. Asinain, Khrihfa biaknak aa dannak cu Pathian a kan kawl. Phun dangin kan chim ahcun, Biaknak dang ahcun, an kawl. Khrihfa biaknak ahcun a kan kawl. Cucu, Khrihmas kan timi sullam cu asi ko. Cucaahcun, mitampi nih khrihfa cu biaknak asi lo (Christianity is not religion) an ti phah. Zeicaahtiah, biaknak nih cun Pathian a kawl caah asi.

Kan dawttukmi he kan i then ka hrawng love song kan sak ah khin kan thinlung dihlakin kan sak tawn. Kan mitthli tiang hmanh kan i thlak sek. Asiah teh, Pathian lovesong kan sak ah khin teh zeitin dah kan sak? Kan thinlung dihlakin Pathian kan pe maw?

Nungak upatmi le duhmi nih caa tlangkhat a kan kuatmi nichiar ti awk in kan rel tawn? Asiah teh, Pathian dawtnak cakuat Baibal teh nikhat ah voi zeizat dah kan rel ve? 

A biapi bikmi cu Pathian nih vawlei misual caah a thlahmi a fapa cohlan hi asi. Pathian nih a thlahmi Jesuh na co lo hlan poah cu biaknak (religion) ah na taang rih. 

Khrihmas kan timi a sullam taktak cu Jesuh he i ton i cohlan hi asi.

___________________________________________________________

Note: A chim lioah keimah pumpak note chungah ka laak khawh zat lawng ka von tial. A tlamtling lonak tampi a um. A ruahzia nan ka thiamnak lai zaangfah kan nawl hna.