Japan Theologian Kosuke Koyama Tuanbia Tawi

Dr. Kosuke Koyama

Asia ramchung Baibal lei minthang thiamsang (third world theologian) hna lakah mi minthang pakhat asi mi cu Kosuke Koyama a si. Keimah pumpak hrimhrim zong nih ka uar tukmi a si caah a tuanbia tawi ka von khomhsuat khawh zat in ka von ṭialnak a si. 

Japan Theologian, Kosuke Koyama cu December 10, 1929 ah Tokyo khuapi ah “protestant” (Baptist) Khrihfa innchungkhar, Koyama phun chungin a chuakmi a si. A hnu ah, United States chung um New Jersey ah aa thial. Cuka cun B.D (Bachelor of Divinity) in Drew Theological Seminary (DTS) sianginn ah  a lak hnu, 1959 kum ah Princeton Theological Seminary ah Ph.D a hmuh than.

Koyama hi  Ralpi II  (World War II) lioah hngakchiate lawng a si. US nih Tokyo khuapi bomb in a puahhnawh lioah khan a rak thi dengmang. Angaingai ti ahcun, kha bantuk lio (ralthawh lio) i Khrihfa rak si kha a har hrim ko. Sihmanhsehlaw, Baptist a si bantuk in Ralpi II lio ahkhan tipil a rak ing. Pastor pa nih a thli tein a rak chimhmi cu, “Kosuke, Pathian nih Jesuh Khrih dawtnak bantuk ngeiding in an auh____na innpa le America minung an si zongah,” tiin. 

Kosuke Koyama nih Lois Koyama cu 1947 ah a thit i fapa pahnih le fanu pakhat Pathian nih thluachuah a pek hna—James, Elizabeth le Mark. Tufa (grand-children) panga: Mathew, Isabel, Sophie, Amos le Silas zong a hmuh manh hna. 

A Riantuannak

Thailand ram Theological Seminary ah cachimtu saya (lecture) a tuan hnu ah 1968 in 1974 tiang Siangapore ah um i Association of Theological Schools in Southeast Asia (ATSSA) ah executive director, South East Asia Journal of Theology (SEAJT) ah editor, le Southeast Asia Graduate School of Theology (SAGST) tbk.  ah Dean a tuan. 

Kum 1974 in 1979 tiang Universtiy of Otago, Dunedin khua New Zealand ramah Senior Lecturer rian a tuan than. A hnu ah Union Theological Seminary, New York ah lecture rian a tuan i 1996 ah a rian in aa din. Amah he aa naihniammi hna le a chungkhat nih cun “Ko” tiin a auh. Kum  zabu 20^th tiangah Japan Theologian minthang bik hna cu Kosuke Kuyama le Kazoh Kitamori an si.

Kuyama nih cauk 34 renglo a tialmi lakah, “Water Buffalo Theology” (1974), “Pilgrim or Tourist” (1974), “No Handle on the Cross: An Asian Mediatation on Crucified Mind” (1976/7), “Three Miles an Hour God” (1980), “Mount Fuji and Mount Sinai” (1984) hna hi minih theih bik an si. SAJT ah editor a si bantukin cauk tampi a tial lengah capar (article) zong tampi a tial. 

Koyama nih a tialmi  cauk hna lakah a laar biknak le minih hngalh a sinak bik cu “Water Buffalo Theology” cauk a tial ruangah a si. Dr. Koyama hi theologian thiamsang pakhat a si bantuk in Abstract theology (Western Theology) le academic catial phun in tampi a tial khawh ko nain a thiam cawnsannak kha hmunhma he aa tlakte in hmanzia a thiam. Water Buffalo Theology hi Thailand ram khuate ah missionary pakhat bantuk in rian a tuan lioah a tialmi a si. Thailand ram mi sifak hna nih lo rian an tuannak ah nifatinte an hmanmi le then loin an umpimi cu “Naa” (Buffalo) a si caah, Water Buffalo Theology tiah min bunh in a tialnak a si. Rev. Dr. Koyama riantuannak nih nichuahlei ram le nitlaklei ram (east and west), Khrihfa le Buddhist ruah/zumhnak, le mirum le misifak karlak ah dawtnak, zaangfahnak, le itheihthiamnak a um khawh nakhnga, hlei a kan donhpiaktu a si.

Dr. Koyama cu March-25-2009 ah Massachusetts (Springfield—USA) sii-inn ah cancer zawtnak in a thi. Koyama cu a thih  lioah kum 74 a si. A dawt bikmi a nupi Lois Koyama zong April-13-2011 ah a nunnak a liam ve. Fapa pahnih, fanu pakhat le tufa panga an ngei. Dr. Koyama nih a hnu bik a chimmi bia cu “Theology le  i dohnak: Theology le  i dohnak Um Loin DawtnakLei ah” (Theology and Violence: Towards A Theology of Nonviolent Love) ti a si. Cu a hnubik a cauk cu Kyobunkwan nih 2009 ah Japan holh in a chuah/published a tuah. Rev. Dr. Koyama cu vawleicung in liam ko hmanhsehlaw, zungzal nunnak vancung khua ah Pathian le a vanmi run hna an lam cuahmah ko, tiah Isaac nih a chim.

Chirhchan laknak: 

• Water Buffalo Theology (25th Anniversary Edition, Revised & Expanded) - Preface to the First Edition - p.xv.
• Koyama, K. (1976). No Handle on the Cross: An Asian Meditation on the Crucified Mind. London, Bloomsbury: SCM Press.
• Davs.id C. Fisher, Tear Down That Wall, May 10, 2009.
• New York Times online, accessed September 7, 2010.
• www.pres-outlook.com/news-and-analysis/1/8640.html, accessed April 2009).
• http://www.ancientfaces.com/person/kosuke-koyama/24671094 
• http://en.wikipedia.org/wiki/Kosuke_Koyama