Kan Chan Hi Chan Tha Asi

Kan vawlei hi atu nakin a rak nuam ballo. Cun atu nakin a nuam chin lengmang lai, a thangcho chin lengmang lai, ti hi science lei thiamsang hna nih an ruahning asi. Asinain, hi tluk in raldohnak, zawtfahnak, mangtaam, le pawngkam rawhralnak a tam lio ah ‘kan chan a tha bik ko!’ von ti cu cheukhat caah cun zumhhar ngai asi ko lai. 

 

Cheukhat zumtu le evangelist pawl nih Paul nih Efesa khuami hna cakuat kha faktuk in an laak, kan caan hi caan chia asi, timi zawn kha (Eph 5:14-16). Zeiruang set ah dah Paul nih ‘kan nii le caan hi caan chia asi’ (the days are evil) a ti hnga, timi hi tampi hrelhfiah khawh asi ko lai (?) A fawinak in chim ahcun, zumtu thar lawngte an si. Jesuh Khrih rak kir than colh ding kha an zumh. Paul zong nih a zumh ve; I Thes 4: 16-17(immediate return of Jesus—parosia). Zumtu thar pawl kha Judah biaknak (Judaism), Grik pawl biaknak le Rom biaknak nih an buahcih tuk hna tikah Khrihfa asi cangmi zong nih khrihfa si lo bantukin an um. Zumlotu hna tuahning kha an icawng. Nu le va kar ah, nulepa le fa le karah, bawi le sal kar ah buainak tampi a rak um. Tukthahnak le hremnak nih a von zulh hoi. Khi vialte ruahchan in Paul nih kan caan hi caan chia asi, atinak a si kho? Kan nih cu Paul nih a hmuh khawh lomi le a chunmang hmanh in a manh lomi chan ah kan hung um. Kum 2000 lenglo in kan ihlat. Jesuh rak thannak ding hi Paul chan lio nakin kan mah chan he kum 2000 lenglo in kan  naih deuh cang tinak asi. Laimi Khrihfa kan sinak kum 100 leng asi ve cangmi nih Jesuh khrih rat thannak cu kan tih awk asi ti hme maw? Kan caan hi caan chia asi ti lo. Caantha asi deuh. Paul thih hnu, Church Fathers chan (A.D. 100-500 kar hrawng) ah pakhat le khat an irak iton poah ah ‘Bawipa a raa deng cang’ (‘Maranatha—the Lord is coming soon’) an rak ti tawn. Caan chia ah an rak ruat lo. Jesuh rat than ding, an rak ingaih tuk. Cucaah, Bawi Jesuh rat thannak ding a naih cu caan chia le chan chia ah ruat loin kan ilawmh chinchin awk asi deuh. Mah balte, zeitik set ah a rat lai bal, kan hngal lo caah kan iralring tein kan um peng awk asi.

Kan chan a thatdeuhnak Panga

Kan Rum Deuh: A luancia kum 50 he kan zohchunh ahcun, mi sawhsawh hmanh nih alet thum in phaisa kan hmuh, i kan eidin zong a thaw deuh. Minung alet tampi in kan karh nain, a luancia kum 50 he tahchunh ahcun kan thangcho tuk thiamthiam. Mi sifak nih alet in an eidin khawh deuh. Vawlei cung ah sifak taktakmi hi zatceo ah an zor. UN ruahdamh nak ah sifahnak hi kan hnulei kum 50 chung ahhin kan hnulei kum 500 nakin azor deuh an ti.

Kan inn le lo a tha deuh: Khuate in khuapi ah chan ah kan ithial. Cucu urbanization kan timi cu asi. Pawngkam zohkhenhtu pawl nih khuapi um cu an duh lo nain khuate um hi pawngkam rawhralnak vennak thabik cu asi lem lo. A ngaingai ahcun khuate nakin khuapi ummi nih hmunhma an heu lo deuh. Vawlei le pawngkam a rawk lo deuh. Cun lothlo pawl khuapi an panh ruangah ram aphangmi eka billion pahnih cu tupi ah an icing than. Matt Redley chimning ahcun, vuleicungmi zatceo nak tamdeuh hi khuapi ah an um nain vawlei 3% lawng an hrawh, a ti.  Kan vawlei le pawngkam kan heu lonak dingah a herhmi cu khuate um si loin inn dot sang pipi tampi in sak kha a herh deuh. 

Kan chan a sau deuh: A luancia kum 30 nakin kan chan a sau deuh. Hngakchia thih a tlawm deuh. Tuluk pawl hi a luancia kum 50 lio nakin kum 25 a nung khua sau deuh. Nigeria pawl hi kum 9 an nunkhua a saudeuh. 

Rian fawideuh le Rangdeuh in kan tuan khawh: Chim awk tampi ko nain pakhat tein ka von langhter hmanh lai. Kum 1800 lio ahkhan suimilam pakhat a nguhmi nathau (phazawngdaing) pakhat cawknak ah suimilam paruk riantuan ahau. Kum 1880 ah cutluk ceunak apee khotu mei-inn cawknak ah minit 15 riantuan aherh. Kum 1950 ahcun sehkan pariat lawng a herh cang. Nihin ni ahcun sehkan cheu lawng a herh. Hi ti tuak ahcun kum 1800 lio nakin let 43, 200 in kan rum deuh i rangdeuh in rian kan tuan kho. 

Thiltha kan hmang kho deuh: Sifaak taktak an tampi rih nain kan mah hlan i a rak um nakin kan mah chan ah eithaw kan ei kho deuh. Kum 1822 hlan ah computer hmanh an rak hmu bal lo. Charles Babbage ser hnu lawngah kan hmuh. A tu kan hmanmi laptop le bang cu an hna zong nih a rak thei lo. April 1973 ah Martin Cooper nih Mobile phone a ser khawh hnu ah kan hmuh. December 17, 1903 ah Wilbur le Orville Wright nih a hmabik vanlawng an ser. Cu hlan ah a rak um bal lo. Kum 1800-1854 ah Jedlik nih Electric Motor a ser. Cu hlan ah a um bal lo. Zabu 17 hnu lawngah lakphakti (tea) din biatak tein a laar. Atu kan chan ah hin thil thaw kan ei, kan zaang a dam. Lamhlat ah khual kan tlawng kho. Tangka tamdeuh kan hmang kho. Rawl tamdeuh kan vuiter. Thil cinnak vawlei zakhat ah 30 (30%) a karh i kum vui cu let ruk in a karh.

Hi ti kan chim tikah mi sifaak an um lo, ka tinak asi lo. A chialei in thil ruah zong hi a thatnak tampi a um ve. Mi sifak a bawmtu hna nih a thalei kam in ruat peng hna sehlaw, tangkaa an bawm hna hnga lo. Nain micheukhat cu a chialei lawngte a ruatmi an rak um ve. Thawngpang chia kan theih ruangah thinpang ding a um lo. Vawlei hi thawngchia lawngte nih a khuah dih rua, ti zongin ruat ding asi hlei lo. Thawngtha cu tampi theih a herh lo. Thawngchia kan theihmi hi a thiltha tampi lakin lakmi an si. Ralrinnak a kan pek asi deuh. Kan chan hi chant ha bik asi ko. Kan fimdeuh, kan rumdeuh, kan eithawdeuh, kan inn tha deuh, kan rum deuh fawn. Cucaah, tihphaih zum hlah. A thalei zum ko.

Chirhchan laknak:

Matt Redley nih Reader Digest Magazine ah a tialmi chungin.

Richard Zatu nih Thinthang Magazine ah a tialmi chungin.

Zeibantuk Mitbenh Dah Na Hman?

India ram, Rajasthan peng, khuate pakhat ah a cang balmi thil asi. Satil (caw, rang, le naa), an thi thluahmah. Hlathlaaitu nih an chimmi cu, ni a linhtuk ruangah ram an car dih i satil nih an ei duh hna lo ruangah an thihnak asi, ti an ti. Cucaah, mitbenh rong hringmi (green color) mi company ah an cah (order). An satil mit ah an benh dih hna tikah an hmuhmi poah a hring in an cuang dih. Ram car, hlan i an ei duh lomi zong kha, a hring in an hmuh dih cang caah khim tein an ei than. Thihnak chungin satil tampi an luat, tiah hlathlaitu nih a chim.

Nifatin kan khuasak tinhtuknak le kan minung hawi sin ka tlawnlennak ah zeibantuk mitbenh dah kan i benh, kan minung hawi hi zeibantuk rong in dah kan hmuh hna, ti hi a biapi ngaingai. Mi pakhat hi zeibantuk minung dah asi timi hi a sining taktak nakin, zeitindah kan hmuh, timi ah aa hngat deuh. Cucu worldview kan timi cu asi. Cu na worldview nih cun na ruahnak, na biaknak, le na sining vialte an thlen khawh fawn. Thinlunglei thiamsang (psychologist) pawl nih virkhoih hlathlaainak an tuah hnu ah, minung hi, a tlangpi in phunhnih ah an then. (1) Athalei kam in khua a ruatmi (optimist), (2) Achialei kam in khua a ruatmi (pessimist) tiin. Zeibantuk ah dah na um? Athalei kam in thil a hmu kho mi maw na si, chiatnak lawng dah a hmu kho mi na si? 

Kan leadership style hi teh, leadership maw asi ko rulership style deuh dah? Leader cu ‘lamsialpiaktu, riantuanpiaktu, hruaitu” tiin sullam fianh khawh asi. Ruler sullam “mi uktu, mipi duhnak siloin mah duhning lawng aa rinhmi” tiin, a fawinak in, fianh khawh asi. Phundang in kan chim ahcun, Rulership timi cu ‘Dictatorship, monarchy style, kingship, totalitarianism, autoeroticism’ asi ti khawh asi. Bangalore Lai Fellowship ihruaining hi leadership style maw, rulership style deuh asi ti zong hi ruah ngaingai a herh. Lai holh ah, “Lei le Dang Aa Seh,” timi kan ngei. A ngaingai ahcun lei le dang aa seh si loin lei le haa tu aa seh. Fiang deuh in chim ahcun ‘haa nih lei’ a seh. Haa nih ka thawng, ka cak tiin zeihmanh a tuah kho lomi lei kha seh lengmang hmanh sehlaw, saudeuh a hmunmi cu lei asi ko. Haa cu tlawmpal ah a beuh hmasa tawn. 

Inn cung sangpi ah a ummi pa nih a tang um mi kha na hmetuk, ti khawh asi lo. A tang i a um pa  zong nih a cung i a ummi pa kha a rak hmetuk ve. Cu bantukin ahohmanh i soi ding, nihsawh, zomhtaih ding kan um lo. Kan mah sining cio ah pakhat khat ti khawhnak kan ngei cio. Ruahchannak kan ngei cio. Lamkam t’hu kutdok (beggar) hmanh nih ruahchannak ngeilo in a t’hu lo. Nifatin kan nunnak—kan thanchonak le tlakchamhnak ah siseh, kan minung hawi kan hmuhning hna tiangin zeibantuk mitbenh in dah thil kan hmuh hna, timi cungah aa hngat. Cucaah, zeibantuk mitbenh dah kan ibenh timi hi a biapi ngaingai.

ṬHANCHO LEI A PANH CUAHMAHMI KAWLRAM NIH IQ LAWNG MAW A ZOH RIH LAI? EQ TEH?

Tutan ah hi bantukin capar/cabia ṭial kawhnak caan a ka petu

(Ṭhinṭhang Mekazin editor le upa) dihlak  Tutan ka capar hi IQ le EQ kong asi. Kawl ralkap butkedan tangah kum 20 leng rialdip le lamhchih buin a thanglianmi kan si caah Lairam lawng hmanh siloin Kawlram dihlak asilo hmanh ah a tam deuh kan lungput le ruahnak cu a rawk dih. Kan mawh ve hme maw, rak lamhchihtuk hrat ahcun mu. Leithuan liomi cawtum le naatum bang, tuk le velh pah buin tuah duhmi tuah kho loin tuah duh lomi tu an rak kan tuahter. Kan fimcawnning tiangin ruah tikah awn duh ahcun firchom a hau ti sehlaw, kan palh thlu lai lo dah? A rawk cangmi kan thinlung, ruahnak le lungput a kan remhtu le sersiamtu asi kho hnga maw, ti ruahchannak he tialmi capar asi.

IQ cu zeidah a si?

IQ cu Intelligence Quotient tiah a saunak in auh asi. Intelligence timi biafang(origin) a chuahnak taktak cu intelligere timi Latin biafang in a ra. A sullam cu ngalhkhawh, thiamkhawh, theihkhawh, cinkenkhawh, tikhi a sawh duhmi asi. Quotient sullam cu then thanmi, phawtzamhthanmi tinak khi asi ve.

Minung fimnak (Intelligence) kong ah ningcang tein(systematic) virhkhoih-hlathlainak hi French ram ah a luancia kum 100 hrawngah khan psychologist Alfred Binet (1857-1911) le psychologist Theodore Simon (1873-1961) nih French sianginn pakhat ah siangakchia cheukhat sinah rak thawk asi (?) Cu hlathlainak cu 1905 kum ah an rak dih, an ti. A chung muru tiang virhkhoih-hlathlainak nih a chuahpi mi cu minung ah hin thiam aa fawihdeuh mi (normal) le a harhdeuh mi/chanbuadeuh mi tiin kan um ko, tihi asi. Cu hlathlainak nih cun French ram chung lawng siloin a hleiin Europe ram le USA ram pawl i siahngakchia cacawn ningcang (system) tiang zong a rak bawmh ngai, an ti.

Cu hnu 1916 kum ah German psychologist William Stern (1871-1938) nih thilthar pakhat thiam/hmuh ifawite le herhning tein thleidan le phawtzamhthiamnak (intelligence quotient) hlathlainak hi a rak tuahve. A tuahning cu thluak nih thil a theih mizat kha a kum in na phawt lai i 100 in na karh ṭhan lai.  Tahchunnak ah;

                  Halmi chungin na hmaanmi zat question (100 in karh) = IQ

                                                       Nangmah na kum

ti khi asi ko. Cu hlathlainak nih a chuahpimi cu, a fawinak in normal a simi nihcun IQ  90-110 kar hrawngah khin um ding asi i, cu naktamdeuh asi ahcun a IQ a sang tinak. Cun, a tlawmdeuh ahcun a niam ah chiah asi. Kul (20) tang hna khi cu mi tlamtlinglo ah chiahmi deuh khi a va si cang nga, a ti.

Cun, thilthar pakhat khat hi kan hmuh cio, kan cawn cio ko zongah a thiam aa fawih/olhkhun mi le aa cinken khodeuh mi phun an um. Cu thil zongah cun kan uardeuh phun, ka n cawn zuamdeuh phun le kan i cinken khawhdeuh phun an um ve rih fawn. Zeiruangah dah asi hnga? Cu hlathlainak zong cu American psychologist Howard Gardner nih 1983 kum hrawngah khan Intelligence Quotient timi minbunh ṭiamṭiam in minung IQ hi phun (5) then in a rak tuah. 

Intelligences phun (5)  

    Musical intelligence:- Music, aw chuah, melody, rhythm… etc., lei ah thiam aa fawihmi pawl. Tahchunhnak ah hlasak thiam, ringawntumthiam…tbt.

Verbal intelligence:- Holh le caa lei ah thiam aa fawihmi pawl e.g. Author, journalist, holh fang hmanthiammi, politicians pawl hei tibantuk khi.

Bodily-kinesthetic Intelligence: -Takpum hmanning cawlcangh thiam aa fawihmi le hrimnam hmanthiam aa fawih mi pawl. E.g. Lentecelh (sport) le laam (dance) thiammi le hriamnam he raltukthiam mi pawl bantuk khi.

  Logical-mathematic Intelligence:- Pehtawnh, ningcang tein (systematic) khuakhan lei le namber/kanaan tuaktan le pungsan suaisam lei ah thiam aa fawihmi pawl. Tahchunhnak ah Chemist pawl le engineer tibantuk pawl. 

Visual-spatial Intelligence:-Thilsuai, hmanthlaksuai, hmunhma (geography) zoh lei ah thiam aa fawhmi pawl. Tahchunhnak ah artist, architect le researcher heiti pawl khi.
 

Hi phunnga (5) hna hi Howard Gardner nihfimnak thawhkehnak (Origin of Intelligence) kha basic in virhkhoih-hlathlainak a rak tuahmi asi. Cucu IQ (Intalligence = theih, ngalh, thiam, cinken khawhnak thazaang le Quotient = phawtzamh/thenthan thiamnak phun) tiah kan auhmi cu asi.  Hi fimthiamnak intelligences phunnga (5) hi minung kan thluak he apehtlaimi lawngte an si, tiah chim khawh zong asi. A ruang cu mit nih hmuh, hna nih theih hnu ah thluak nih a tuaktan i thiammi thil pawl an siruang ah asi. Cucaahcun, IQ sang mi kha thluakṭha mi asi tiin kan auh tawnnak hna cu asi. Hihi a huap in tuahmi intelligences phunnga chungah hin mi pakhat nih a phun (5) ningin thiam i olhnak zong ngeihkhawh asi i, phunkhat hmanh iharh ngai khawh zong asi ṭiamṭiam fawn. Phuntam deuh a thiam naa fawih ahcun na IQ a sang deuh tinak asi i a tlawmdeuh le na IQ niamdeuh tinak asi, tiah a fawinakinchimkhawh asi.  

EQ cu tehzeidahasi?

Chan a hung kali globalization/socialization chan kan von luh hnu

hin, IQ phunnga (5) lawng nih minung kan nunnak ah thil a rak tlamtlinh dih lo zia von theihchin thluahmah asi. Cu ruangah Howard Gardner ṭhiamṭhiam nih EQ timi hi a rak chuahpi ṭhan. A suanak in EQ cu Emotional Quotient ti asi. Cu EQ cu phunhnih in a von ṭhen veṭhan.

 Intrapersonal intelligence/personal intelligence: -Mah le mah feeling/tuarmi theihthiam khawhnak le cu feeling vialte (lomhnak, ngeichiatnak, ningzah, thinphan) tibantuk theih in a hmanzia, a tuarzia le a langhterzia thiamnak kha a sawh duh.

  Interpersonal intelligence/social intelligence: Midang lung kalning, mi lungput theihthiam piaknak [Sympathy a siloah empathy kan ti hnga maw? Sympathy sullam cu na tuarmi/ruahmi ka theihthiam (I understand what you think/feel) ti asi. Empathy sullam cu na tuarmi/ruahmi kantuarpi/ruah pi ve(I think/feel what you think/feel) ti asi. Phundang in kan chim ahcun, empathy sullam cu na takvon kaa hruk ve tinak a siloah naa denhmi kedan ka denh ve/na ke dan cungah ka dir ve ti khi a sawh duh (I wear your skin or I stand on your own shoes)],tiin Haward Gardner nih phunhnih ah a ṭhen ṭhan. Hifimnak hi mizeipoah nih cawn le ngeih cio kan herh mi asi. Abikin mipi hruaitu pastorte, cachimtu sazate, sibawite le ramriantuantu hna a herhkhun kho men.

EQ tu cu thluaklei si ti loin lungthinlei he pehtlaiin thiamnak phun asi deuh. Cu thil phunhnih cu minung dang he kan i pehtlaihnak ah a herhmi le thiamawk hrimhrim dingah chiahmi asi. Minung lungthin le ruahnak lei thiamnak a cawngmi (psychologists) tampi nih cun hi EQ phunhnih nih hin a dang IQ phunnga zong khi a rulh (effect) khawh/a tuahkho (thlennaktampi a chuahter), ti tiangin an zumh. Cun, a ṭhangchocangmi ram hrimhrim ahcun sianginn, sport team, film industry, public le organization dangdang ah IQ san lawng hi abiapibik ah an chia ti lo i, a EQ the zeidah a lawh ti hi zoh chih peng asi, an ti. Cu ticun, minung lungthin le fimthiamnak (Emotional and Intelligence) he a ṭhangchomi sinak dingah ram tamdeuh nih cun izuam asi cang. Phundangin chim ahcun, IQ lawng siloin EQ zong kha biatak tein thazaang an pek tinak asi.

Pawngkamruangah maw?Ciruangah dah?

Minung IQ/EQ san le niam hi pawngkam thil ruangah maw? ‘Ciruang’ ruangah dah? timi hi rak iceih lengmangmi a rak si. Atu tiang zong ah iceih peng rih asi ko.  Psychologists a cheu nih cun 60-70% hi cu ciruang in a kal i 30- 40% hi pawngkam thil sining ruangah asi, tiah an chim ve. Asinain, IQ le EQ cu thluak le lungthin ruahnak (psycho) kong asi caah hihi a hmaan/a palh, tiah aphi chim khawh awk hi a ṭha tawn lo. A har dom, an ti. Psychologists pawl zong nih an mah le hlaihlaining cio in pom asi ve i cu an pomning cu minung nunnak ah hman cio ansi. Hmandeuhmi/aa tlakdeuhmi an um bantukin aatlakdeuh lo tiin hlawtthlu ding zong aum ve hro lo, an ti ve.  

Asiahcun ṭhancholei a panhcuahmahmi Kawlram le Lairam ah teh?

Buaktlak (average) in kanzoh/chim ahcun Japan ram hi IQ ah asang in chiahmi ram pakhat asi. Asia ram chung lawng hmanh siloin vawlei ah technology le fimthiamnaklei ah a sangbik an si, ti zongah kan palhthlu lem hnga lo. Asinain, Europe ram lei nih a kalpi deuhmi cu IQ he EQ he hmunkhat/artlaang tein kalṭi le ṭhanchoṭi hi asi ve. Europe ram tamdeuh nih cun ngakchia a hmet lio tein lungthinlei a thanchonak dingah thiamcawnnak lawng hi pakhatnak ah chiah loin a pahnih tein (IQ he EQ) hmunkhatte i than pi khawh dingin siangiin kip le hngakchia no zohkhenhnak (daycare) kip ah kalpi ansi. Cu nih a chuahpi mi cu lungthinlei (emotional) in ṭhangchonak asi.  Ruahnak a san tikah an fimnak (intelligences) sannak zong kha ningcang tein hmanthiam asi. Tahchunnak ah mah zon lawng iruahlonak, keimah nih mah tihin thil katuar/kahmuh i midang nihteh zeitin an tuar, an hmuh ve lai tibantuk, mi sining theihthiamnak le mi dang zawnruah khawhnak hna khi a chuahpimi cu ansi. 

Asiahcun, Ralkap uknak cozah in (dictatorship) in democracy uknak lawng hmanh si loin mah tein ihruai khawhnak (federal/secular state) leiah thlen a duhmi le a tim cuahmahmi Kawlram le Lairam minung nih teh fimthiamnak kan cawnbiknak asi mi kan sianginn system ah siseh, inn chungkhar siseh, zatlang nun le company zongah siseh, thluaklei fimnak (IQ fimnak) lawng hi maw kan kalpi peng rih ko lai? Phundang kan chim ahcun, mah pumpak ṭhatnak le minthannak lawng le mah chungkhat le sahlawh rualchan lawng zawnruahnak ngeih in maw kan ṭhancho rih ko lai? Siloah mah zawnlawng i ruat loin, mi cungah theihthiamnak, dawtnak le zawnruahnak a ngeimi lungthinlei fimnak (EQ fimnak) ṭhanchonak he dah artlaang tein kan kalpi hna lai?

Chiarhchan laknak:

•  Tha Chin Par (Denmark) pumpak notebook chungin.
•  Howard Gardner’s tialmi, Howard Gardner’s Nine Multiple Intelligenes cauk chungin.
•  Howard Gardner le E.D. Hirsch Jr., nih tialmi, ʻʻTwo Views on How to Get Johnny to Read and Think,”New York Times, September 11, 1999 capar chungin.
•  Spencer A. Rathus nih tialmi, Psychology cauk chungin.
•  Paul D. Meier nih tialmi, Introduction to Psychology and Counseling: Christian Perspectives and Applicationscauk chungin.
•  Henry Nawl Thang Bik nih class-presentation paper a tuahmi chungin.

   Note: Hi cathluan hi Thinthang Magazine nih a chuah cangmi asi.