Run To Win

I Cor 9: 24, “Tlik zuamnak ah an dihlak in tli cu an i zuam nain laksawng a hmumi cu pakhat lawng asi ti kha an hngalh. Cucaah laksawng hmu ding tein tli u.”

Jesuh khrih a chuah hlanpi in lentecelh puai (Olympics) a rak um

2013-2014 cacawn kum, BCBS Sport & Gamesah Fr. Thawng Tha Thang chim lio

cang. An rak thok diam cang. Olympia khua ah siseh, Athens khualipi te hna ah B.C. 8 lio hrawng khan an rak thok cangmi Olympics asi. Kum tampi emperors hruainak tangah rak tuahmi puai asi. Kum 4 ah voikhat tuahmi asi. Summer le winter an then ruangah kum 2 ah voikhat phun in a tla. Cu lioah, Olympic puah gold medal a hmutu nih zeibantuk caanṭ့ha (opportunity) dah a hmuh ti ahcun, pakhatnak ah, ‘ralkap na ṭuan hrimhrim lai,’ timi zulhphung (policy) in a luat. Pahnihnak, cozah sinah pek dingmi ngunkhuai (tax) a chan chung a luat. A pathumnak ah an ram chungah a ṭha bikmi sianginn ah sianginn kai man um loin (free from school fee) an kai lawng siloin an fa le chan tiangin an kai kho. Cun an mah min in, an mah aiawh ah kai khawh a rak si thiamthiam. Gold medal a hmutu nih hi caan ṭha pathum hi a hmuhmi an si. Atu kan chan ahcun cu te hna cu kan ti kho men nain, cu lio chan ah ralkap rian in luat le ngunkhua in luat timi nakin a sang deuhmi caan ṭha a um lo. Cucaah cun, cu lio chan i Olympic puai zuamnak ah a lutmi minung tampi cu ‘ka tak a rit sual lai,’ ti phan ah taklawng in zuamnak a lutmi zong an rak um len. A donghnak ah micheu le bang cu zeitin dah an tuah ti ahcun, ‘hawi dang nakin karkhat, karhnih te ka rang deuh ah’ ti ruat in an ngeihmi hmul vialte zong an ziah dih, ti asi. Cu tluk cun, teinak hmuh duh ah an rak tuah. Teinak hmuh an rak izuam. 

Cu ve bantukin Paul nih teinak hmutu nan sinak dingah tli u (run to win), a kan ti ve. Teitu sinak dingah Paul nih phunthum a chim. 

Lungthawhnak (Motivation): Mi tampi cu lentecelh zuamnak

puai an luh tikah team caah an lut lo. An mah pumpak caah an lut. Minthan duh ah an lut. Mipi nih theihmi si duh ruangah a lutmi an si caah gold medal an ngah lo zongah a poi ah an chia lo. Team members pakhat kan si phawt ahcun a zaa ko, timi ruahnak le lungthawhnak he an lut caah gold medal zong an ngah lomi minung tampi an um. Mi cheukhat ve cu, minung an um lo ruangah zuamnak ah lutmi an um. An lungthawhnak (motivation) a fek lo caah teitu an si bal lo (run to win) siloin (run to fail) tu asi tawn. Mi cheukhat baak cu, pakhatnak kan hmuh lo zongah pahnihnak kan hmuh khawh ahcun a zaa diam timi ruahnak le lungthawhnak he zuamnak ah a lut mi an um ve hoi. Cu bantuk minung cu zeitik hmanh pakhatnak hmutu an si bal taktak lo. Asi ah kan nih teh teitu kan sinak dingah zeibantuk lungthawhnak (motivation) nih dah a kan nam? timi hi kan i ruah ngaingai a herh.

Kum 1968, Mexico Olympic lioah tlik zuamnak (Marathon) ah Tanzania ram aiawh in a zuammi John Acquawary timi pa hi an tlik lioah aa khawndeng sual. ‘Tli ti duh hlah hme,’ tiah committee pawl nih an fial. ‘Ka ram nih tlik dingin thlahmi ka si caah a donghnak hmun ka phak hlan lo cu ka tli ko lai’ a ti hna. Mipi nih a mah pakhat te lawng an hngah. Zaan suimilam 7: 30 pm ah a hung phan. Stadium in minung ting-tan nih an ngah. A phanh cangka, mipi an dir dih. Ahohmanh a au lo le capei beng lo mi an um lo, an ti. Cu tluk cun mipi lung a lak kho, an ti. ‘Zeiruangah dah na tli loin na um ko lo’ tiah bia an hal. ‘Hi tlik zuamnak (marathon) ah tel dingin meng tampi hlat in ka raa. Ka ram cozah le mipi nih phaisa ting-tan tampi dih in an ka thlahmi ka si. Lam canceo in a kir mi lentecelhtu si nakin ka nunnak tiang pek lawlaw hmanh ka duh deuh,’ tiah a leh hna. Nihin ah ka tuan cuahmahmi rianah, teitu kan sinak dingah zeibantuk lungthawhnak (motivation) nih dah a kan mongh/nam timi hi a biapi tuk. 

Mah le mah isum khawhnak (Self-control): Teitu sinak ding ahcun mah le mah isum/itei khawh hi a biapi tuk. Bawlung tuanbia ah a zia ṭhabikmi Zeadane, a hnubik a tuanbia  ṭialmi kah. Adawhlo ngai. A ruang cu, a mah le mah a tei khawh lo caah asi. A thin a sum kho lo caah asi. Cucaah cun, ‘Zeadane nih Pelee a phaan kho lai lo. Zeidang ruangah siloin a donghnak a tuanbia ṭialmi te a dawh lo caah asi,’ an ti phah. Roney le C. Ronaldo kong zong kha. Kum 2006 World Cup (Quarter final) an kai lio. Roney cu Red card in a chuak diam. A thin aa sum kho deuh lo ruangah. Team asi zongah, pumpak asi zongah, thlarau lei le taksa lei asi zongah teitu asi mi cu mah le mah a tei kho mi an si zungzal tawn. Mah le mah in tei khawh (self-control) hi a rak biapi tuk.

Training: Training ngei le ngei lo cu an i dang tuk. Bawlung chuih thiam sinak dingah a takpum kha a hrem hmasa a herh. Aa fit a herh. Training ngeilo pi in ahohmanh zuamnak a lut mi zong an um bal lo. Training tuah cio cio hmanh tam deuh a tuahmi nana cu teitu an si deuh tawn. Gold medal ngahnak dingah a tlawmbik thla 10 chung training a tuah a hau.  Long distance zuamnak a lut dingmi nih nikhat ah 10 -20 miles a tlik peng a hau. Swimmer nih nikhat ah meng 10 ti aa liauh ve a herh. Gymnasts work nih nikhat ah suimilam 8-9 chung a ritmi a thlircawi a herh ve. Pathian riantuantu pawl nih teh zeitluk in dah kan i fit khawhnak dingah training kan la?

A cunglei pathum hna hi St. Paul nih lentecelhnak he pehthlai lawngin a kan cawnpiakmi asi lo. Khrihfa kan sinak zongah an biapi tuk. Mi tampi cu khrihfa kan si ko. Nain teitu si dingin kan izuam bal lo. Zei nih dah lungthawhnak (motivation) a kan pek ti ahcun thlauchuah hmuh ruangah, facang dipkhat kan hmuh ruangah khrihfa asi mi zong tampi kan um kho? Kan nule pa khrihfa asi ruangah khrihfa asi mi zong tampi kan um ṭhiam ṭhiam.

Pathian riantuantu pawl the zeibantuk lungthawhnak nih dah Pathian rian kan tuannak ah a kan mongh? Hruaitu kan sinak ah teh zeitindah kan mah le mah kan tei, kan i control? Ka chimmi tuah u, ka tuahning in tuah ve hlah u,’ timi hruaitu hna ka si sual hnga maw? Zeitindah Pathian riantuantu tha, thlarau tlau tampi tlaitu kan sinak dingah trainging kan tuah? Baibal kan rel peng maw? Thla kan cam maw? Teitu si ding hi kan izuam awk asi. Hruaitu kan sinak ah Moses bantukin mah le mah itei khawh lo ruangah (self-control) a donghnak aa dawh lomi tuanbia tialtu si loin kan donghnak tuanbia ṭialmi rel awk ṭha ding kha a biapi tuk. Ministry caah itimhtuahnak le training tlamtling he kan i manh/ready a herh. Cucu teitu nih a tuah dingmi thil an si.

Note: Hi cathluan hi Rev. Fr. Thawng Tha Thang nih 2013-201 cacawn kum BCBS Sport & Games Onnak ah a chimmi biatawi asi. Kan copy khawh mual kan von tial than hoi. Tlamtlin lonak le palh sualmi a ruahzia nan thiam lai ka zumh.